好感恩中五時遇到你，相信所有留到最尾嘅學生都係咁諗（就算中途走咗都唔代表係你嘅教學出現問題，可能純粹唔適合/負擔唔到/唔再需要補習等種種原因，唔知你會唔會怪責自己，我只係想像緊如果我做補習面對學生走應該會有呢啲自我懷疑）。喺中學嘅時候 — 尤其中五中六呢兩個關鍵年份，遇到嘅每個老師都必定喺生命中留低化唔開腳印。痴線，我到而家都係靠腦入面播你把講「又醒又叻攞A」、「負入正出出正值」、「駁住電池負極就係負」嘅聲做卷，concepts都唔需要再刻意背。所以話有意無意都好，有啲嘢老師講咗就會記成世。多謝你教過嘅書、講過嘅道理，我唔想記都記咗喇 😂 希望你可以繼續感染一代又一代嘅學生。做老師好似好煩，尤其是補習冇假期咁濟，行政啲嘢又要自己搞⋯⋯每年都要重複好多好多步驟：上堂教返同一份書、落堂仲要答學生問題、處理幕後嘅事（諗起都頭痛 😮‍💨），好難先有完完全全屬於自己嘅時間，仲要好似個唔太睇到盡頭嘅輪迴咁。但因為你份堅持，我哋呢啲學生先可以追返進度/彌補到學校老師教得唔夠透徹嘅漏洞。唔止係教書，仲有幫我哋重拾對chem嘅自信、有時聽吓經、上堂笑吓咁，都令我哋喺好難捱嘅中學生涯有返或多或少堅持落去嘅動力同樂趣，所以多謝你。希望你落堂後除咗食兩餸飯，間唔中可以請自己食啲好啲嘅嘢！祝你做到你想退出補界為止，之後去做你仲有想做嘅嘢～ 加油呀阿sir，感激有緣做你學生 🙂‍↕️p.s. 中五啱啱加入嘅我勁驚你上堂又叫我答問題，以為你玩針對 😂 新生就唔好咁快嚇親佢哋喇